تقرير الإنتهاك : عبد الرحمن صلاح زرروه

تفاصيل الإنتهاك

عبد الرحمن صلاح زرروه -مقيم كرداسة -الجيزة يبلغ من العمر 26 عاما و يعمل مدرسا بإحدى المدارس بمحافظة الجيزة تم اعتقاله يوم 24 ديسمبر الماضى بواسطة رجال امن بلبس مدنى وذلك اثناء ذهابه لمكان عمله حيث يعمل مدرسا ومنذ ذلك التاريخ الى اليوم لا تعلم اسرته مكان او اسباب اعتقاله رغم انهقد سبق ان قامت قوات الداخلية باعتقاله لمدة يومين وتركته بعد ذلك وقد قامت الاسرة بارسال بلاغات الى النايب العام والى وزارة الداخلية التى لازالت تنكر علمها بوجوده لديها وتتخوف اسرته من تعرض حياته للخطر وتناشد جميع اجهزة الدولة بسرعة اطلاق سراحه نقلا عن أخت عبد الرحمن : اخويا عبدالرحمن خرج رايح شغله في مدرسة ابن حزم يوم الاثنين الموافق 24/12/2018 الساعه 9:45 ص لقيتو بيكلمني من رقمه الساعة ٢ ظهرا بيقولي حد هيجلي من المدرسة عندو ياخد تلفونه التاني علشان نسية ومحتاج منو حاجات تخص المدرسة وفضلت معاه على التلفون ٦ دقايق وانا بدور على الفون بسألو انت كويس؟؟قالي، ايوه قلتلو طب ماتيجي انت تاخدو، قالي عندي حاجات في المدرسة بخلصها قلتلو طيب انا اجيبهولك قالي لا اديه للي هيجيلك البيت!!! لقيت الفون وقفلت معاه، واديتو لخويا يديه للي جاي من المدرسة، قالي ده حد كبير مش تلميذ!!! كلمت عبدالرحمن تاني وقلتلو اللي موجود اسمو ايه قالي ادهولو وخلاص قولتلو لازم تقولي اسمو ياما اجي انا اديهولك قالي اسمو محمد محمد ده خد التلفون الساعه ٢،١٥ وبعدها ب نص ساعة تلفونات عبدالرحمن ال ٢ اتقفلو! روحنا سألنا في المدرسة قالولنا انو مراحش المدرسة اصلا اليوم ده!!! وواحد من الجيران قالنا انو شاف ناس بزي مدني ماشين معاه وبيركبوه عربيه!!! كلمنا المحامي بالليل يسأل عليه في القسم قال مش موجود هناك!!! عملت تلغرافات تاني يوم للنايب العام والمحامي العام لنيابات شمال الجيزة ولمكتب حقوق الإنسان ولوزير الداخليه أن اخويا مختفي دون أي سند قانوني، وخدت صورة رسمية من التلغرافات دي انا بكتب الكلام ده علشان اثبت حالة وعلشان اخويا ميتلفقلوش اي تهمه وعلشان لو حد يقدر يساعدنا يساعدنا وعلشان قلب امي المحروق عليه وعلشان قلة الحيلة اللي بقينا فيها، وعلشان دولة القانون والمؤسسات ازاي يتخطف الناس فيها من الشوارع وميبقالهمش اي أثر!!! وعلشان الناس كلها بتقولي اصبر ومتتكلمش لحد مايظهر وعلشان محدش عارف ممكن يحصلوا ايه لا قدر الله!!! انا بناشد كل الناس واي حد واي مسؤل انهم مايقبلوش ده على اهاليهم ولا قرايبهم، انهم يساعدونا ويخرجوا اخويا المشهود له بالاحترام والادب والسيرة الطيبة بين الناس وكل اللي زيه، اخويا مدرس بيربي أجيال ومش مجرم وملوش اي نشاط سياسي، وسبق قبل كده قوات من الشرطة جم البيت واقتحموه بالليل وخدوه يومين وخرج علشان معلهوش اي حاجة!!! كل الناس بتقولي متتكلمش علشان ميتأزيش بس لو اتأزي محدش هيعملو حاجة!!!! حرام كل شوية تعب وبهدلة وظلم من غير سبب، حرام الاحاسيس اللي معيشنا فيها دي والرعب والخوف والقهر وقلة الحيلة من غير اي سبب!!